الحمد لله رب العالمين .. مالك الملك .. الوهاب .. الرزاق بغير حساب .. والصلاة والسلام على سيد الخلق أجمعين والمبعوث رحمة للعالمين .. سيدنا محمد وعلى آله وصحبه وسلم اللهم تسليما كثير .. اللهم واجمعنا فى زمرته واحشرنا تحت لوائه يوم لا ظل إلا ظلك يا ربنا ... اللهم امييين ...
حد فكر قبل كده .. ليه البيت .. دونا عن غيره من كل الاماكن .. بنحبه .. بنحس فيه بالأمان .. بنحب نرجعله .. بنبقى على راحتنا فيه ... بنشعر بالانتماء له .. ليه البيت .. ليه بيتنا بالذات اللى ليه الصفات دى .. ؟؟؟
عارفين ليه ... علشان البيت بيتنا ... علشان بنحس انه بتاعنا .. أو علشان فعلا هو بتاعنا ... والانسان دايما بيحس تجاه الحاجه اللى هى ملكه انها قريبة جدااا منه .. انه بيهتم بها اوووى .. انها تستحق منه كل رعاية .. انه عاوزها تكون أهم حاجه فى حياته .. عاوزها فى احسن حال .. سيارته .... شقته ... حجرته ... ليه كل ده علشان حاسس .. مش بس حاسس لكن متأكد انها بتاعته ..
والغريب .. ان ساعات الناس تبقى بتحب شغلها أوووى ... ناجحة فيه جدااا .. عندها استعداد تقضى فيه وقت طويل من غير تعب ... ولما تفكر .. يا ترى ليه .. وازاى بيستحملوا ... هتكتشفوا لو قربتوا شوية من الناس دى انهم حاسين ان شغلهم زى بيتهم .... حاسين انه بتاعهم ... وهنا مش بتحتاج تقولهم اجتهدوا .. اخلصوا ... اتقنوا ... باختصار مش محتاج توصيهم على شغلهم .. علشان هو زى بيتهم تماما ... هو بتاعهم ...
طيب الكلام ده كله ليه ... !! .. الكلام ده علشان أقول فى الأخر ... الجمعية .. اللى احنا اعضاء فيه .. أى جمعية .. بس أنا هتكلم عن جمعية " الخير كتير " ... يا ترى إحنا حاسين انها بيتنا ... هل لما بننزل علشان نشتغل فيها .. بنحس اننا نازلين من بيتنا ورايحين على بيتنا برضه .. هل حاسين انها بتاعتنا .. ولا حاسين اننا أعضاء فيها ... على فكرة تفرق كتير أوووى .. أعضاء ولا بتاعتنا ... أنا بشتغل فى المكان ده ولا المكان بتاعى ...
لو المكان بتاعى هبقى بحبه جداااا ... هبقى نفسى اتواجد فيه كتير ... هبقى بتمنى أخليه أحسن مكان .. لو حاسس ان المكان بتاعى مش هحس ان الجمعية إدارة واعضاء وان الادارة مسئولة وانا لما يطلب منى حاجه هعملها .. لكن انا اللى هبادر ... انا اللى هسأل على المكان ... لو انا حاسس ان المكان بتاعى هيبقى فى قلبى زى بيتى بالظبط ...
على فكرة .. أكيد مش كلنا حاسين الإحساس ده .. احساس " البيت " ... لان أكيد الدنيا والنتائج كانت هتبقى مختلفه ... وموضوع البيت ده والاحساس بيه .. غير فكرة اقتناعك بمسألة ان يبقى ليك دور وانك تكون نافع فى مجتمعك .. احنا ان شاء الله كلنا التانى .. بس مش كلنا الاولانى ..
لكن المهم ... هل فعلا احنا مقتنعين اننا محتاجين نحس ان الجمعية بيتنا .. ومقتنعين ان الدنيا هتبقى أقوى بكتير او كلنا اتغيرنا .... الاقتناع أولى خطوات التغيير والنجاح ..
نيجى للنقطة التانية .. طيب إزاى ... نوصل للنقطة دى ... احنا مش هنتكلم عن إدارة وأعضاء ... احنا هنتكلم ان كلنا واحد ... وكلنا هنتعاون مع بعض .. أنا كفرد هبذل مجهود وههتم اكتر .. وهشوف فعلا ان المكان انا عاوز احس انه بتاعى .. ملكى .. علشان أقدر انجح فيه وأكبره .. وكمان كل اللى حواليه هيساعدونى .. هنتكلم مع بعض .. صحيح كل واحد عنده مشروع ... بس المشروع ده حجره من حجرات بيته .. بيهتم بيه مش اكتر ولا أقل من اهتمامه بالبيت كله ... وجوه المشروع نفسه .. كل الناس واحد ... كل الناس بتفكر إزاى تخلى بيتها وحجرتها أجمل ..
أملوا يا جماعه نفسكوا باحساس البيت ده .. الجمعية بتاعتى .. بيتى .. بتاعتى مع ان انا دورى صغير جدااا ومش ناس كتير تعرفنى .. وبتاعتى مع ان انا دورى بارز وكل الناس عارفانى .. الجمعية زى بيتى .. ومشروعى زى حجرتى فى البيت .. وزملائى هما اخواتى اللى معايا فى البيت .. بحبهم جدااا .. فى قلبى جدااااا ...
فكروا .. ومن انهرده .. تعاملوا مع الجميعة بالاحساس ده وبالمعنى ده .. ونساعد كلنا بعض .. اللى عنده المشاعر دى يساعد باقى الناس انها توصلهم .. واللى لسه موصلهاش .. يملى قلبه بيها .. وإن شاء الله ربنا يفتح لنا جميعا ....
والسلام عليكم ورحمة الله وبركاته
جميع الحقوق محفوظة-®جمعية الخير كتير
فريق التكنولوجيا
صح صح نيتك
