وذكر فإن الذكرى تنفع المؤمنين- 78- لا تتراجع خطوات .. وإن فعلت .. تقدم مرة أخرى
" وذكر فإن الذكرى تنفع المؤمنين " - 78 -
" لا تتراجع خطوات .. وإن فعلت .. تقدم مرة أخرى "
الحمد لله رب العالمين .. والصلاة والسلام على سيد الخلق أجمعين والمبعوث رحمة للعالمين .. سيدنا محمد ... صلى الله عليه وسلم
مازلنا بننتظر قدوم شهر رمضان بفارغ الصبر ... علشان نرجع نقرب مرة تانية من ربنا .. ونحس بالاحساس الجميل إننا فى معية الله .. وكلنا أو أغلبنا متفقين إننا بعدنا شوية كتير وأصبحنا بنعمل الأشياء فى كتير من الاوقات بحكم العادة .. وبندعى دايما .. اللهم خذ بيدينا إليك .. اللهم ردنا إليك ردا جميلا .. ولكن السؤال : هو إحنا امتى بدأنا نبعد ... وممكن نرجع إزاى ... فى رمضان .. وبره رمضان كمان .. ؟؟
إحنا بدأنا نبعد شوية بشوية من غير ما ناخد بالنا ... لما بدأنا نفرط فى أمور بسيطة واحدة واحدة .... وتعالوا نشوف أمثلة ونشوف بتنطبق على مين فينا ...
ساعات بنكسل نفول الأذكار اليومية ... وبنقول عادى ... هنقولها بكرة ... كنا ملتزمين جدااا فى وقت من الأوقات إننا نصلى الضحى ... ودلوقتى ممكن تعدى .. كان فى وقت من الأوقات مينفعش نشوف محتاج ومنطلعش صدقه .. دلوقتى بيحصل صلاة القيام وقتها قل كتير .. ومرات كتير بنبقى تعبانيين .. وبنقول هتبفى نعوضها ورد القرآن اليومى .. اللى كنا بيخلينا نختم فى شهر ... بقينا نختم فى 5 شهور كنا زمان مركزين جدااا لساننا لا ينطق ألا بما يرضى الله .. دلوقتى ساعات بيفلت
الأمثلة كتير على فكرة .. وممكن يكون أغلب الأمثلة حاجات احنا قصرنا فيها .. مع إننا مازلنا بنعملها .. يعنى مش هناخد ذنب إننا بقينا نعملها أقل .. لكن اللى هناخده إن ايدينا اللى كانت ممدوده ... بين وبين ربنا ... الايد دى بتتأثر .. وواحدة واحدة بتتراجع لورا مع كل حاجه بقينا إحنا كمان نقصر فيها .. ونقول عادى مش مشكلة ..
وبعد مرور وقت من الزمن .. ومن غير ما ناخد بالنا ... بنلاقى نفسنا .. بعدنا .. ومبقاش عندنا الحماس الأول .. والقلب الأول .. والاحساس بالقرب من ربنا اللى كنا بنحسه فى الأول .. وكل ده علشان إيدينا إحنا اللى بدأت تتراجع .. بفعل تقصيرنا اللى إحنا مش واخدين بالنا منه .. مع إن يد الله ممدودة بالليل والنهار لمن أراد ...
خلينا نتفق إننا نتقدم تانى الخطوات اللى رجعناها ... نفكر إيه الحاجات اللى إحنا قصرنا فيها .. وواحدة واحدة .. مع كل حاجه هنرجع نظبطها هنلاقى إيدينا بدأت تعلى مرة تانية ... هنلاقى إحساس بالسعادة والفرحة والأمل بدأ يغمر قلبنا تانى ...
باقى على رمضان أيام قليلة جداااا .. لو اجتهدنا فى الأيام دى إننا نرى الله منا خيرا ... نقدم الدليل على إننا بنحاول إننا نظل موصولين بالله .. اعتقد ده هيبقى أحسن عمل ممكن ندخل بيه على ربنا فى رمضان .. ولعل الله بصدق نياتنا يبلغنا ليلة القدر وهو راض عنا ....
والسلام عليكم ورحمة الله وبركاته
جميع الحقوق محفوظة-®جمعية الخير كتير
فريق التكنولوجيا
صح صح نيتك
