" محاولات لتزكية النفس 17 .. 1-2-3 قبل بداية الـ 10 الأواخر "
الحمد لله رب العالمين .. حمدا كثيرا كثيرا كثيرا .. طيبا مباركا فيه ... والصلاة والسلام على سيدنا رسول الله صلى الله عليه وسلم صاحب الخلق العظيم ... معلمنا ومربينا وقدوتنا إلى يوم الدين وسلم اللهم تسليما كثيرا ...
الحقيقة كذا فكرة جت فى بالى اكتب عنها انهرده .. لكن واحدة منهم كان ليها الأولوية ... وربما الأفكار التانية يجى دورها فى مرات قادمة ... لكن الأولوية المرة دى للهمه والنية قبل العشر الأواخر ...
بداية احنا لكنا بنتطلع للـ 10 الأواخر من شهر رمضان .. وبنتحرى وندعو الله أن يبلغنا ليلة القدر جميعا ... ويبلغنا حسن عبادة وطاعة لله ... يارب جميعا ان شاء الله ... بس هو الموضوع مش معركة لبذل أعلى مجهود وأطول قيام وأكثر دعاء وأشد همه بقدر ما هو مسألة صدق نوايا ...
ويقينا ربنا بيقبل النوايا الخالصة لوجهه .. كمان ربنا بيأجرنا عليها جميعا اذا استحضرنا أكثر من نية فى العمل الواحد .... علشان كده إحنا فى بداية رمضان استحضرنا نوايا كتير للصيام .. لكن هل إحنا فعلا مازلنا بنصوم على نفس النوايا .. ولا نسيناها ومحتاجين نتذكرها مع بعض تانى خاصة مع دخولنا على أيام الفائز فيها هو من صدقت نيته .....
تعالوا نتذكر تانى النوايا اللى اخدناها قبل رمضان .. عسى الله أن ينظر لنا نظرة رحمة ورضا فيقبلنا بها إن شاء الله .. ويبلغنا بها ليلة القدر ...
أولا : إحنا صايمين رمضان امتثالا لأمر الله تعالى .. يعنى طاعة لله ..
ثانيا .. صايمين علشان ربنا يكرمنا بإنه يحقق فينا المراد من الصوم وهو بلوغ منزلة التقوى فيجدنا الله حيث أمرنا ولا يجدنا حيث نهانا ..
ثالثا احنا كمان صايمين علشان الصوم ده عمل يحب الله ورسوله .. ولذلك صومنا يحقق رضاء الله تعالى عنا ... اللهم امييين ... فرضا الله سبحانه وتعالى غاية أهدافنا فى هذه الدنيا ..
رابعا ... احنا صايمين ... وبنعمل طاعة ... علشان نقرب من ربنا .. لاننا لما نكون طائعين ربنا هيكرمنا بأننا نكون أقرب ...
خامسا ... احنا صايمين علشان عاوزين العتق من النار ... رقابنا بيد الله ... بيده العفو والعتق لنا جميعا ...
سادسا ... احنا صايمين شهر رمضان .. لعشان بعد ما يخلص عندنا مهمة كبيرة ربنا خلقنا ليها وهى اعمار الارض وهى مهمة شاقة لا يعيننا عليها الا عبادة طويلة وتضرع بين يدى الله
سابعا ... احنا صايمين ... علشان ربنا يفتح لنا ... ربنا بيده مفاتح الغيب .. وبيده مفاتح الكون .. وبيده يفتح لنا كل مغلق ... فان ارضيناه ييسر لنا كل صعب ويهون علينا كل عسير ويفتح لنا كل مغلق .. نسأل الله ان يفتح لنا فى كل ما يرضيه عنا ..
ثامنا .. احنا بنحب ربنا أووووى ... ونفسنا جدااا ربنا يحبنا ويزود حبه فى قلوبنا .. ويرزقنا حب سيدنا محمد .. لا يكون ذلك الا بطاعة وحياة فى سبيل الله .. اللهم اعنا عليها
أخيرا ... احنا بنصوم .. علشان ربنا اختصنا بنصرة هذه الأمة لما هدانا وعرفنا الطريق والرسالة .. واحنا محتاجين نكون جديرين بتحقيق مراد الله ...
كل يا جماعة ما استحضرنا النوايا دى صادقة فى قلوبنا ... حيه فى قلوبنا ... ربنا هيأجرنا عليها ان شاء الله ... وهيعيننا على أدائها ... ربنا يفتح لنا ولكم ...
أرجوكم ادعوا الله أن يثبتنا جميعا بعد رمضان ... عاوزين نخرج من رمضان أقوى مما كنا فى رمضان نفسه ... عاوزين نخرج من رمضان أقوى فى مواجهة الفتن والحياة ... عاوزين نخرج من رمضان فنظل باقى حياتنا على مراد الله ولا يعننا على ذلك الا الله اذا علم منا صدقا حقيقيا فى الاقبال عليه وطلب رضاه .. اسأل الله ان نكون جميعا على هذا القلب ..
اللهم بارك لنا فى رمضان وبلغنا ليلة القدر وانت راض عنا ... اللهم اميين
والسلام عليكم ورحمة الله وبركاته
جميع الحقوق محفوظة-®جمعية الخير كتير
فريق التكنولوجيا
صح صح نيتك
