السلام عليكم ورحمة الله وبركاته


متابعين معانا .. الكورس الجديد اللى بنقدمه للأطفال ... فى إطار مشروع " قادة المستقبل " ... برنامج " سيرة الحبيب محمد صلى الله عليه وسلم ... "


فى اللقاء التانى مع الأطفال ... اللى كان يوم السيت 14/11/2009 .. كانت بداية المقدمة للسيرة النبوية الشريفة ....


أهداف اليوم كانت محددة ...


1- ليه بنحب رسول الله ؟
2- ليه هو أكتر حد يصلح إننا نقتدى به دونا عن غيره ؟
3- مواقف صلى الله عليه وسلم مع الاطفال اللى كلها حنان وعطف واحترام ...


وكان ختاما للقاءنا فقرة عنوانها .... " لو بنحبه ... لازم نفرحه " ... وأكتر حاجه تفرحه صلى الله عليه إنه يعرف أننا بنعمل اللى طلبه مننا .. واللى هو الاساس حاجات ربنا علمهاله علشان يعرفهالنا ...


عملنا دا ازاى ... كتبنا على لوحة على الحائط عدد من أحاديث الرسول صلى الله عليه وسلم ... زى " إماطة الأذى عن الطريق صدقه " .... " ألا أدلكم على شئ إذا فعلتموه تحاببتم .. أفشوا السلام بينكم " ... " من صلى البردين " العصر والفجر دخل الجنة " ... وأحاديث تانية كتير ... وبعدين طلبنا من كل طفل يختار واحد من الأحاديث المكتوبة ... ويقول أنا هنفذ الحديث دا طول الأسبوع علشان أفرح رسول الله وبكدا أثبتله إنى بحبه ... صلى الله عليه وسلم ...


مكناش محتاجين أكتر من حديث واحد بس كل طفل يختاره ... لكن لاقينا بعضهم بيقول أنا هختار أكتر من واحد وفى كل مرة وأنا مثلا ببتسم فى وجه صحبى .. هفتكر انى كدا بفرح رسول الله لانى بسمع كلامه ...

أطفال تانية قالت ... احنا كل اسبوع هنختار حديث وهنعمل بيه ... علشان نقول لرسول الله إننا بنحبه ...

المهم إننا احنا كمان كمدربين اختارنا كل واحد حديث وعلشان نلتزم به علشان نقول لرسول الله إحنا بنحبك ... واتفقنا فى الاخر مع الاطفال .. اننا هنحكى سيرة الرسول صلى الله عليه وسلم .. علشان كل ما نعرف عنه اكتر كل ما نحبه أكتر .. وكل ما نحبه أكتر هنكون معاه إن شاء الله وقريبين منه فى الجنة ...


صلى الله على محمد صلى الله عليه وسلم ...